Fursat mile kabhi

Kahin dur kisi jheel ke kinaare

Pancchiyon se gappe ladaate

Hawaaon ko apna geet sunaate

Aur baadalon se bad-badatein,

Baahein khole zindagi baithi hogi!

Tujhse dur,

Iss khokhli duniya se dur

Kalesh aur pyaar ke bazaar se dur

Insaano ke iss khaufnaak jungle se 

Bahut dur!

Tujhse khafaa, 

Maayus aur bebas,

Wo tera intezaar kar rahi hogi

Fursat mile kabhi apne jahaan se…

Toh zara use milte aana!!!

 

Thaamkar jiska aanchal 

Bachpan me sambhalna seekha tha,

Har mushkil mod par

Jiska haath pakadkar chalna seekha tha,

Aaj use hi kisi ki chaukhat par

Chhod aaya hai!

Kisi ke saaye ka peecha karte-karte

Apne saaye ko bhi

Peeche chhod aaya hai!

Ho sake toh thoda waqt nikalkar

Apni parcchai ke saath bethna,

Uss se uska haal puchna

Aur fir, jab fursat mile kabhi dono ko…

Toh zindagi ko…

Zara gale lagaate aana!!!

 

Kuch kehti nahi,

Badi bholi hai bechari

Har dard ki ghadi me,

Hamjoli hai hamari

Gumsum si rehti hai,

Alag si rehti hai

Par apne aap me wo 

Mast rehti hai,

Pasand nahi use

Iss duniya ka jhutha dikhava,

Isliye zara si naraaz rehti hai!

Shayad kuch kehna chahti hai wo

Koi nayi seekh dena chahti hai wo

Bebas, akeli,

Tera intezaar kar rahi hai

Teri raah tak kar,

Apna guzaara kar rahi hai!

Kabhi pata puchke uska,

Fursat mile agar waqt se…

Toh zara…

Zindagi se milte aana!!!

Apne hone ka…

Ehsaas karte aana!!!


-Sahil

Advertisements

2 thoughts on “Fursat mile kabhi

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s